በስመ አብ ወወልድ ወመንፈስ ቅዱስ አሐዱ አምላክ አሜን

ቅድመ ልደተ ክርስቶስ የነበረው ዘመን የጨለማ ዘመን ነበረ ሲባል ፀሐይ ብርሃንዋን የነሳችበትና ምድሪቱ በጨለማ የተዋጠችበት ዘመን ነበር ማለት አይደለም በጨለማ የተመሰለ ኃጢአት የሰፈነበት፣ አለማወቅ ወይም ድንቁርና በሰው ላይ የነገሰበት ዘምን መሆኑን ለማመልከት ነው። “ሰው ግን ክቡር ሲሆን አላወቀም።ልብ እንደሌላቸው እንስሶችም ሆነ፣መሰላቸውም” እንዳለ ቅዱስ ዳዊት ።መዝ.49፤20። መላው የአዳም ዘርን ዲያብሎስ የላሜ ልጅ የአውራዬ ውላጅ ብሎ በሥጋ በነፍስ ተቆራኝቶት ይኖር ስለነበር አብዛኛውን አእምሮውን ለብዎውን ተነስቶ ዕደ ኅሊናው፣ እግረ ኅሊናው በድንቁርና ተገርኝቶ የአምላኩ ገጽታ ጠፍቶበት በተፈጥሮ ከእርሱ ያነሱትን ለእርሱ የተፈጠሩትን ፍጥረታት አምላኩ አድርጎ ያመለከበት የሰገደበት ኅሊናው በክህደት ጨላማ ተውጦ ለጣዖት የተገዛበት ወቅት ነበር። ይህን ጊዜ ነው አማናዊው ፀሐይ ኢየሱስ ክርስቶስ ኆኅተ ምሥራቅ ከተባለች ከድንግል ማርያም ተወልዶ ጨለማ ለዋጠው ዓለም ያበራው

ይህን ጊዜ ነው አማናዊው ፀሐይ ኢየሱስ ክርስቶስ ኆኅተ ምሥራቅ ከተባለች ከድንግል ማርያም ተወልዶ ጨለማ ለዋጠው ዓለም ያበራው “በጨለማ የሄደ ሕዝብ ታላቅ ብርሃን አየ ፤በሞት ጥላና በጨለማ ሀገርም ለነበሩ ብርሃን ወጣላቸው” ተብሎ አስቀድሞ  ነቢየ ልዑል በኢሳይያስ የተነገረው ቃለ ትንቢት ፍጻሜ ያገኘው። በዚህ በልደት ቀን ሰማያውያን መላእክት ከምድራውያን እረኞች ጋር በአንድነት ዘመሩ የጥበብ ሰዎች ጥበብን ያዩ ዘንድ ከምሥራቅ በኮከብ እየተመሩ ጥበብ በአካለ ሥጋ በተገለጸባት ቤተ ልሔም ተገኙ፤ይህ ሁሉ ሲሆን ሄሮድስና የመሲሁን መምጣት፣ የብርሃንን መገለጥ በጉጉት ሲጠባበቁ የነበሩ መምህራነ እስራኤል በታላቅ እንቅልፍ ውስጥ ነበሩ። ሰማያውያኑን ከምድራውያኑ ጋር በአንድነት ያስፈነደቀው ፤የምድር ነገሥታትን ወደ ምድረ ፍልስጤም እንዲመጡ ያስገደዳቸው ዐቢይ ክስተት መከሰቱን አንዳችም ነገር አያውቁም ነበር።